افضل وصفة حنه و سدر علي الأطلاق عن تجربه الكثير

بسم الله الرحمن الرحيم

السلام عليكم ورحمة الله وبركاته

كيفكم عساكم بخير ؟؟

حسيت اني من زمان مانزلت موضوع يخص الجمال وهالموضوع منجد كثييير سئلوني عنه المتابعات وصديقاتي واهلي انو وش مسويه بشعرك يابنت؟ وش الخلطه الي صورتيها لنا ؟

المهم اي احد يعرفني يدري ماعندي لف ودوران واي شي اجربه ويزبط اعلم ماعندي حركات حريم اعطي الوصفه ناقصه ههههههههه 

 لا بعد اعلم وش زودت احس وشوله الكذب يمديك تفتحين قنوات الاجنبيات وتاخذين الي تبين وهن يهوديات ولا مسيحيات ولا كذبو المفروض احنا المسلمات الي نكون كذا ومن هالمنطلق عاد لازم تثقون بالاشياء الي احطها لان مو بس انا الي جربت  حتي صديقاتي واهلي جربو هالطريقه بالذات وبذكر لكم معاناتي كامله بس اصبرو 

طبعا انا شعري كان طويل وحلو وانا صغيره مره بعدين قصيته كاريه وانا باول ابتدائي لان صعبه كل يوم صبح يمشطوني وحالتهم حاله وكنت مره شيطانه هههه ف الحل السهل القص ومن يوم كنت صغيره لما الحين ماقد رجعت طولت شعري وصلت ثالث ثنوي وبعد ماتخرجت شعري بدا يتساقط تساقط جدا جدا مرعب لدرجه من قدام صار عندي زي فراغين المشكله اقول لاهلي والي يعرفوني يقولون من اول انتي كذا لا تكبرين الموضوع بس صدق اوكي شعري ماكان واااو بس مو لهالدرجه لان مابحياتي اصلا اعتني فيه بس صدق مو توصل فيه للتقريع هههههههه 

المهم كنت مسافره برا ورحت للدكتور وسويت كل التحاليل الممكنه تتعلق بتساقط الشعر الرهيب ووريته وانا جالسه عنده كيف مجرد المسه يطيح وقصيته بوووي مره قصير ولا وقف التساقط طلعت تحاليلي وقال هذا طبيعي كل انسان بفتره من حياته تمر فيه هالحاله وبامكانك البحث عنها بالنت وطنشته قلت وشو يعني يقرع 

تركت الموضوع سنه ونص لما رجعت السعوديه شارت لي وحده الله يجزاها بالخير انو ارجع للحنه والزيت وان ماخرب شعري الا لما تركتهم المهم انا وبنتها بدينا بنفس الوقت نحط حنه حتي لما رجعت سافرت برا اخذت معي حنه وسدر كنت مره احط حنه ومره سدر ومره اخلطهم الاثنين اوكي كانت حلوه النتيجه رجع شعري ينمو وطلع لي بيبي هير وتحسنت نوعيه شعري واحس الشعره نفسها ثقلت 

بس ماعمري شفت شعري مثل هالمره بعد مابديت استخدم هالطريقه كنت طفشانه وكتبت بالنت افضل طريقه حنه للشعر وقرأت كذا طريقه وجمعتهم مع بعض وبديت استخدمها بس بالصيفيه 

لما رجعت اداوم واسلم علي صديقاتي كلهم تفاجأو بالتغيير ولاحظو تغيير شعري ويقولون وش سويتي وش هالتغيير وانصعقو حتي بنات ما اموون عليهم مره سئلوني !!

بس جلست افكر ياربي ماسويت شي يعني نفس نظامي حنه وسدر وزيت 

وبعدين تذكرت اني غيرت طريقتي بالحنه

المهم عطيتها صديقاتي وجربوها حتي امهاتهم وكللللهم لاحظو الفرق بشعورهم وانبسطو من النتائج يعني تنفع للكل 

طبعا السؤال الي دايم يجيني واقلقتوني فيه طيب انا شعري مصبوغ وش اسوي ؟

الي شعرها مصبوغ تستبدل الحنه بالسدر وتستخدم نفس المكونات 

مالكم بالطويله هذي هي الوصفه 

حنه علي حسب طول شعرك حطي الكميه مثلا انا استخدم خمس ملاعق كبار كل وحده تحط الي يكفي طوول شعرها 

 فنجان حبة البركه الي هي الحبه السوداء مطحونه

فنجان قرنفل مطحون

ملعقة قرفه مطحونه

فنجان محلب مطحون انتبهي المحلب يختلف عن الحلبه اسئلي العطار عنها يعطيك 

ملعقة عسل
نص علبة زبادي
بيضه

فنجان زيت جوز الهند واذا ماعندك حطي اي زيت تفضلينه مثل زيت الزيتون

ملعقه خل اي نوع عادي المهم خل

تعجن الحنه اول شئ بالماء الساخن وبعدين اضيفي لها المقادير واعجنيهم مع بعض لين تتكون لك عجينه شبه سائله واتركيها تتخمر علي الاقل ساعه ولو تتركينها من الليل لثاني يوم افضل بس صراحه انا اخلطها واتركها ساعه واحطها لاني مو دايم اخطط متي ابي احط علي حسب وقت فراغي بس لو تقدرين من قبل بيوم افضل

هالخلطه لتكثيف وعلاج مشاكل فروة الشعر والرأس حتي الي فيهم قشرة شعر راحت من تجربة صديقتي كانت تعاني منها وجتني تقول ملاك راحت القشره مني 

المهم ادري المقادير باقي شوي وتركبيها بقدر الضغط من كثرها بس والله صدق بتدعون لي بعد تجربتها 

لو استمريتي عليها شهرين كل اسبوع مرتين او ثلاث بالبدايه بتدعوون لي

انا مره تعبت مع الحنه وكل ما اسئل احد مايعلموني وش يحطون عاد الحين الناس صارت تسئلني وش احط بعد ماشافو التحول ماشاء الله بشعري 

اذا كنتي تبين لون شعرك يصير بني حطي قهوه تركيه او نسكافيه او بودرة الكاكاو مع الحنه 

ولو تبينه احمر اعجنيها بمويه الشاهي او الكركديه او حطي قشور الرمان اطحنيها وحطيها مع الخلطه 

انا سوت لي لون بشعري مره حلوه حتي مره وحده تسئلني وش لون صبغتك هههههه لون بني علي احمر لاني احيانا احط كركديه واحيانا كاكاو ف صار لو غريب وحلو بني علي احمر ههههههههه طيب اذا تبون ريحه حلوه بشعركم عن ريحة الحنه جيبي ورد مجفف موجود عند العطارين او بالدانوب واطحنيه واعجني حنتك والورد بمويه الورد او مويه الزهر او الكادي المهم شي ريحته حلوه 

ويعطي ريحه تجنن اكثر مع السدر احيانا قبل المناسبات احط سدر و ورد مجفف مطحون و ملعقتين محلب مطحون  واعجنه بمويه ورد ويخلي ريحه شعري تجنن عشان لما اسلم علي الناس يصير فيني ريحه حلوه لان اكره شي عندي اسلم علي وحده واشم فيها ريحه شعر او ريحه حرق الاستشوار هذا بيخلي ريحه شعرك حلوه مره 

يالله عاد جربوها وادعوولي 

مابي منكم الا الدعاء لكل وحده عانت مع الشعر وان شاء الله بنزل لكم اشياء كثير للشعر لاني عااانيت لين وصلت للمرحله هاذي ولله الحمد من تجارب كثير وبقولكم كل شي بالصيدليه خرررطي مافيه شي نفعني مثل الحنه والزيوت والاشياء الي تسووينها بالبيت لا تشترين اشياء غاليه واخر شي تطيح بكبدك مثل ماسويت انا 

لا اله الا انت سبحانك اني كنت من الظالمين

سبحانك اللهم وبحمدك اشهد ان لا اله الا انت استغفرك واتوب اليك